«Բիզնես և Կրթություն Ասոցիացիան» միջազգային համագործակցության կամուրջ
«Բիզնես և կրթություն գործընկերություն» հիմնադրամի նախաձեռնությամբ Հայաստանի կրթական հաստատությունների ներկայացուցիչները՝ «Բիզնես և կրթություն ասոցիացիայի» անդամները, մասնակցեցին միջազգային VET CONNECT 2.0 միջոցառմանը, որը տեղի ունեցավ 2025 թվականի մայիսի 18-23-ը Թբիլիսիում։
Միջոցառմանը մասնակցեցին ոլորտի ներկայացուցիչներ ավելի քան 20 երկրից՝ հիմնական ելույթներով հանդես եկան՝ Վրաստանի, Լեհաստանի, Սինգապուրի, Չինաստանի, Հունաստանի, Հայաստանի, Իտալիայի և Հունգարիայի ներկայացուցիչները։ «Բիզնես և կրթություն ասոցիացիայի» մասնակցությունը միջոցառմանը կարևոր քայլ էր՝
- Միջազգային գործընկերային կապերի ամրապնդման,
- Մասնագիտական կրթության լավագույն փորձի ուսումնասիրման և ներդրման,
- Նորարարական հմտությունների ձևավորման և զարգացման ուղղությամբ։
Միջոցառման շրջանակներում Ասոցիացիան ներկայացրեց նաև Գերմանիայի Bildungswerk der Wirtschaft Mecklenburg-Vorpommern e.V.-ի հետ համատեղ իրականացվող աշակերտական ընկերությունների և մենթորության ծրագիրը: Ներկայացվեց նաև SE VET Erasmus+ ծրագիրը, որպես կարողությունների զարգացման միջազգային նախաձեռնություն: Ծրագիրն ունի հետևյալ նպատակները․
- Կրթական հաստատությունների կարողությունների ուժեղացում՝ վերապատրաստումների, մենթորության և գործընկերային ուսուցման միջոցով,
- Համագործակցության խթանում ուսումնական հաստատությունների և տեղական համայնքների միջև,
- Ուսանողներին խրախուսում՝ ստեղծելու սոցիալական ազդեցություն ունեցող տեխնիկական լուծումներ։
Մասնակիցները այցելեցին Կախեթիում գործող առաջատար մասնագիտական քոլեջ, ծանոթացան մեղվաբուծության, գինեգործության, ավտոսպասարկման, ՏՏ և խոհարարության ոլորտներում կիրառվող ծրագրերին։
