Այսօր ՀՀ Կրթության և գիտության նախարար Արմեն Աշոտյանն ընդունել է «Աշխարհի Հմտություններ»-2015 միջազգային մրցույթի հայաստանյան պատվիրակությանը: «Աշխարհի Հմտություններ» 43-րդ մրցույթը, որն ի դեպ առաջին անգամ է անցկացվում Լատինական Ամերկայում, կկայանա օգոստոսի 11-16-ին` Բրազիլիայի Սան Պաոլո քաղաքում: Ներկայումս Աշխարհի հմտություններին անդամակցում է 75 երկիր, որոնցից 62-ը մասնակցելու են մրցույթին, իսկ 59-ը` մրցելու:
Հայաստանի Հանրապետությունը 2012 թվականից դարձել է «Աշխարհի Հմտություններ» միջազգային կազմակերպության անդամ: Հայաստանի ազգային թիմը (մասնակցությամբ քոլեջների ուսանողների) առաջին անգամ մասնակցել է 2013թ. Գերմանիայի Լայպցիգ քաղաքում կայացած «Աշխարհի Հմտություններ» 42-րդ մրցույթին՝ ոսկերչություն, նորաձևության տեխնոլոգիա և խոհարարություն մասնագիտությունների գծով:
«Աշխարհի Հմտություններ» 43-րդ մրցույթին Հայաստանի թիմը կներկայանա հետևյալ մասնագիտություններով՝ մեխատրոնիկա, ՏՏ ցանցային համակարգերի կառավարում և ոսկերչություն:
Հայաստանյան թիմի մասնակցության ֆինանսավորումն իրականացվում է պետական բյուջեի միջոցների հաշվին:
Նախարարի հետ հանդիպմանը մասնակցում էր նաև GIZ կազմակերպության WS Armenia ծրագրի համակարգող Յուլիա Ստակյանը: Այս կազմակերպությունը հոգում է թիմի տրանսպորտային ծախսերը:
Նախարարը հաջողություն մաղթեց մրցույթի մասնակիցներին:
