«Բիզնես և կրթություն — գործընկերություն» հիմնադրամը (Հիմնադրամ) Գերմանիայի Դաշնության Մեկլենբուրգ-Ֆորպոմերանիա Դաշնային տարածաշրջանային էկոնոմիկայի ուսումնական կենտրոնի հետ համագործակցության շրջանակներում 2018 թվականից իրականացնում է «Մասնագիտական կրթություն և ուսուցում — համագործակցություն» («ՄԿՈւ — համագործակցություն») ծրագիրը, որի նպատակն է՝ խթանել Հայաստանում երիտասարդների զբաղվածության ապահովումը՝ գերմանական դուալ/աշխատանքի վրա հիմնված ուսուցման (ԱՀՈւ) համակարգի ներդրման արդյունքում նրանց մասնագիտական գիտելիքների և ունակությունների մակարդակի բարձրացման միջոցով: Նման համակարգը հնարավորություն է տալիս ուսումնառության գործընթացը կազմակերպել երկու վայրում զուգահեռաբար՝ ուսումնական հաստատությունում՝ 30-40 տոկոս և ձեռնարկությունում՝ 60-70 տոկոս հարաբերակցությամբ, որտեղ գերակշռում է գործնական ուսուցման հատվածը:
Հայաստանում ՄԿՈւ ոլորտում գերմանական դուալ/ԱՀՈւ համակարգի ներդրմանն աջակցելու նպատակով Հիմնադրամի և գերմանական մասնագետների կողմից կազմակերպվել են բազմաթիվ ծրագրեր, այդ թվում նաև՝ ՄԿՈւ հաստատությունների տնօրենների և գործատուների վերապատրաստման մի շարք դասընթացներ:
Վերը նշված ծրագրի շրջանակներում 2022 թվականի հունվարի 18-ից 20-ը իրականացվեց վերապատրաստման ծրագրի 3-րդ փուլը կրթական հաստատությունների տնօրենների և գործատուների համար՝ «Աշխատանքի անվտանգություն և Առողջություն» թեմայով:
Վերապատրաստման շրջանակներում մասնակիցներն այցելեցին «Դառգետ» գործարան, որտեղ նրանք ծանոթացան գարեջրի պատրաստման տեխնոլոգիաների ընդհանուր գործընթացին, ինչպես նաև աշխատավայրում անվտանգության և առողջության պահպանման կանոններին։
Նպատակներից է՝ ծրագրի ընթացքում ստացած գիտելիքների կիրառումը կրթական հաստատություններում և ձեռնարկություններում աշխատանքի անվտանգության և առողջության ապահովման կրթական գործընթացի բարելավումը՝ համագործակցելով գործատուների հետ և ներգրավելով նրանց կրթական ծրագրերի մշակման գործընթացին, արդյունքում՝ համապատասխանեցնելով կրթական հաստատություններում ստացած գիտելիքներն ու ունակությունները ձեռնարկություններում առկա և պահանջվող աշխատանքային պայմաններին:
Դասընթացը վարեց Գերմանիայի Դաշնության (ԳԴ) փորձագետ պարոն Բարթելսը, վերապատրաստմանը մասնակցել է նաև ԳԴ Ծրագրի ղեկավար տիկին Ֆոկը:
Միջոցառման բոլոր մասնակիցները ստացան վերապատրաստման մասնակցության հավաստագրեր։
