«Աշխարհի հմտություններ» համաժողով 2026 WorldSkills Conference 2026
Թեման՝ «Հմտությունների վրա հիմնված ապագայի ձևավորում»
2026 թվականի սեպտեմբերի 23–25-ը Չինաստանի Շանհայ քաղաքում անցկացվեց WorldSkills Conference 2026-ը՝ մեկ հարկի տակ համախմբելով տարբեր երկրների առաջնորդների, քաղաքականություն մշակողների, միջազգային կազմակերպությունների, արդյունաբերության ներկայացուցիչների և երիտասարդների՝ քննարկելու հմտությունների և տեխնիկական ու մասնագիտական կրթության և ուսուցման (ՄԿՈՒ) ապագան։
Մասնագիտական կրթության և ուսուցման զարգացման ազգային կենտրոնի տնօրեն Տաթևիկ Գասպարյանը համաժողովին մասնակցեց որպես WorldSkills Armenia-ի պաշտոնական պատվիրակ։
Եռօրյա համաժողովի առանցքում ժամանակակից աշխարհի կարևորագույն հարցերից մեկն էր՝ ինչպես մարդկանց ապահովել արագ փոփոխվող աշխատաշուկային և ապագայի աշխատանքին համապատասխան անհրաժեշտ հմտություններով։
Ժողովրդագրական փոփոխությունները, թվային փոխակերպումը և կանաչ անցումը վերափոխում են տնտեսություններն ու աշխատաշուկաները՝ առավել կարևոր դարձնելով միջազգային համագործակցությունն ու ՄԿՈՒ համակարգերի զարգացումն ։
Համաժողովի առանցքային թեմաներից էր «Դեպի ՄԿՈՒ գլոբալ օրակարգ» (Towards a Global TVET Agenda) նախաձեռնությունը, որը մեկնարկել է 2025 թվականին՝ նպատակ ունենալով ամրապնդել միջազգային համագործակցությունը, ապահովել գլոբալ ՄԿՈՒ նախաձեռնությունների առավել համակարգված զարգացումը և արագացնել արդյունավետ ու նորարարական մոտեցումների տարածումը։
Նախաձեռնությանը միացել են առաջատար միջազգային կազմակերպություններ՝ UNESCO-UNEVOC-ը, Աշխատանքի միջազգային կազմակերպությունը (ILO), ՏՀԶԿ-ն (OECD) և Եվրոպական կրթական հիմնադրամը (ETF), իսկ «Աշխարհի հմտություններ» միջազգային կազմակերպությունը հանդես է գալիս որպես ասոցացված գործընկեր։
Համաժողովի շրջանակում քննարկվեցին նաև՝
• ՅՈՒՆԵՍԿՕ-ի Global Skills Academy-ի դերը՝ հմտությունների զարգացման հնարավորություններն ու միջազգային շարժունակության ուղիները մարդկանց հասանելի դարձնելու գործում,
• ՏՀԶԿ-ի PISA-VET նախաձեռնությունը և ՄԿՈՒ զարգացման համար միջազգային համադրելի տվյալների կարևորությունը,
• Աֆրիկայում ՄԿՈՒ համակարգերի զարգացման միտումներն ու միջազգային համագործակցության դերը,
• ինչպես նաև 2030 թվականից հետո հմտությունների վրա հիմնված ապագայի ձևավորման առաջնահերթությունները։
Համաժողովն ավարտվեց միջազգային համագործակցության ամրապնդման և կոնկրետ գործողությունների կոչով՝ ներառական, ապագային պատրաստ հասարակություններ և հմտությունների համակարգեր ձևավորելու նպատակով։
Հայաստանի մասնակցությունը նման միջազգային հարթակներում նպաստում է միջազգային համագործակցության ընդլայնմանը և Հայաստանի ՄԿՈՒ համակարգի զարգացման՝ գլոբալ հմտությունների միտումներին ու նախաձեռնություններին համահունչ գործընթացներին։
